Хæрзаудæн акци

Михайловскæйы цæрæг Сиданаты Артурæн æнæниз уæвын у йе стырдæр бæллиц. 11-аздзыд уæвгæйæ низтæй у йæ хъуырмæ. Дзæбæхгæнæн сæ бæргæ ис, фæлæ уымæн дæр æхца хъæуы. Бинонтæн та сæ къух н` амоны. Ныййарджыты ныфс нæ сæтты. Республикæйы хæрзаудæн фондтæ дæр цæттæ сты баххуыс кæнынмæ, уыимæ ма хæларзæрдæ адæмæй дæр нæ республикæ цух нæу. Бинонты ныфс нæ сæтты, куыд сæ бон у, афтæ тох кæнынц низимæ. Сывæллон дæр йæ фидæнимæ рæсугъд фæндтæ бæтты æмæ йын хъуамæ сæххæст уой.

Сиданаты Артурыл кæд 11 азы йедтæмæ нæ цæуы, уæддæр йе `взонг уд бавзæрста фондз уæззау операцийы. Артур йæ райгуырдæй нырмæ зæрдæнизæй рынчын у. Уый йын фаг нæ уыд æмæ ма йæм бафтыд сколиоз дæр. Астæуыхъæд æрмæстддæр 15-аздзыдæй ис сраст кæнæн. Операцийы размæ уал дары корсет, цæмæй йыл йæ низ бынтон ма стыхджын уа, уый тыххæй.

Корсет хуымæтæг нæу. Скæнынц ын æй Мæскуыйы сæрмагондæй. Йæ аргъ мæнæ-мæнæ бирæ нæу — 55 мин сомы. Фæлæ уыцы фæрæзтæ рауæлдай кæнын дæр бинонты къух н` амоны. Сывæллоны мад æххуысмæ баулæфыд хæрзаудæн фонд «Быть добру»-мæ. Йæ разамонæг Хъуысаты Амырхан куыд зæгъы, афтæмæй гæнæн æмæ амалæй æххуыс фæкæнынц ахæм сывæллæттæн. Ф уыдонæн дæр сæ авналæнтæ цыбыр сты. Фонды æххуыс аразгæ у хæларзæрдæ æмæ хæрзгæнæг адæмы фæкастæй.

Артурæн кæд æнцон нæу, уæддæр йæхимæ хъусыныл нæ фæци. Цард уарзы, цин кæны йæ алы боныл дæр, фæнды йæ боксы секцимæ бацæуын. Гасситы Мураты уæлахизты фæстæ сывæллоны зæрдæйы фæзынд ног бæллиц.


Нырма уал Артур хъизæмар кæны низæй. Йæ иунæг ирхæфсæн — компьютер. Уымæй хъазгæйæ дзы йæ низтæ дæр айрох вæййынц. Фæлæ виртуалон дуне царды æцæг ахорæнтæ нæ баивдзæн. Артур дæр æй æмбары, уырны йæ, фидæны йын кæй баххуыс кæндзысты, уый.

_
Мы рядом в:
vk.com/irystontv
instagram.com/irystontv
Telegram: t.me/irystontv
youtube.com/irystontv
twitter.com/irystontv